Iðntölva

Táknræn mynd af iðntölvu með inngöngum og útgöngum

Iðntölva með spennufæðingu lengst til vinstri, nettengingu í bláum kapli og stýrimerki á einingunum

Kerfunum er stýrt af iðntölvum sem Iðnaðartækni útvegar frá sínum birgja.

Iðntölvan er heilinn í kerfinu. Á ensku er iðntölva kölluð PLC (Programmable Logic Controller). Allur jaðarbúnaður tengist við iðntölvu í stjórnskáp, iðntölvan fær þannig t.d. upplýsingar um hitastig eða stöðu rofa. Iðntölvan stýrir líka mótorum, stjórnlokum og öðrum tækjum. Iðntölvan er forrituð af sérfræðingum Iðnaðartækni, oft í samræmi við kerfislýsingu, og iðntölvan sér um að halda réttu hitastigi í kerfum, keyra blásara og dælur þegar þess þarf o.s.frv. Iðntölvur hafa langan líftíma (15+ ár) og geta keyrt samfellt í fleiri ár, þess vegna eru iðntölvustýringar yfirleitt valdar þar sem þarf að stýra flóknum kerfum yfir lengri tíma.

Samskipti iðntölvu við jaðarbúnað fara gjarnan um harðvíraða inn- og útganga (sjá nánar um Stafræn og hliðræn merki) eða með seríal samskiptum (sjá nánar um Modbus).

Notendaviðmót við iðntölvuna getur verið margs konar.

• Fyrir umfangsmeiri kerfi eru gjarnan valin skjámyndakerfi sem keyra í Windows-umhverfi og þar hefur notandi aðgang að rauntímaupplýsingum um kerfin í lifandi kerfismyndum. Þar sem skjámyndakerfi keyra á tölvu með mikla vinnslu- og geymslugetu er einni hægt að skoða viðvaranir og rekstrargildi aftur í tímann.
• Fyrir minni kerfi eru oft settir upp snertiskjáir í stjórntöflu þar sem hægt er að sjá raungildi frá kerfinu og gera nauðsynlegar stillingar í myndrænu viðmóti.
• Fyrir allra minnstu kerfin nægir oft að setja bara upp rofa og gaumljós í stjórnskáp og þar með hefur maður hið einfaldasta viðmót, hægt er að velja rekstrarstöðu og sjá einföld boð um raunverulega stöðu kerfisins (Í gangi / Bilun).