Viðbrögð við bilunum

Hvað á að gera við vandamál

Til þess að uppræta vandamál þarf jú að komast að rótum vandans. Ekki er nóg að taka bara rafmagn af/á til að endurræsa ef orsök er óþekkt. Og það hjálpar lítið að segja tæknimönnum að "ekkert virkar". Fleiri samverkandi þættir geta legið að baki rekstrarfrávikum og bilunum. Einnig geta komið upp aðstæður sem enginn sá fyrir og þá þarf tæknimaður að vita hvaða aðstæður voru uppi þegar vandamál kom upp.

Í þessu samhengi er gagnlegt að skrá niður aðstæður og staðreyndir sem nýtast tæknimönnum til að greina vandamálið. Meðal áhugaverðra staðreynda eru t.d. tímasetning fráviks, útihitastig, hvaða kerfi er um að ræða, hvaða tæki sýna vandamálið, hitastig í kerfi, óskgildi, staða stjórnloka, staða hraðabreytis.

Vantar hita í hitakerfi

Ef hitakerfi nær ekki upp hita þá getur það verið af ýmsum ástæðum sem vert er að athuga:

• Er inntakssía hitaveitu hrein?
• Eru handvirkir lokar að og frá stjórnloka opnir?
• Er stjórnloki í sömu stöðu og notendaviðmót sýnir?

Óstöðugur reglir

Reglir er óstöðugur ef stýrimerki eða mæligildi sveiflast mikið. Það geta verið ýmsar ástæður fyrir því, t.d. of mikill þrýstingur á hitaveitu, lítil hreyfing á efninu sem er verið að regla eða óheppileg uppbygging kerfis. Sjá nánar í kafla um regla.

Kerfi óáreiðanlegt

Ef kerfi hegðar sér ófyrirsjáanlega eða nær ekki réttri stöðu er gott að nota kerfismynd á kerfiráði til aðstoðar við greiningu vandamálsins. Ef vandamálið er t.d. of lágur hiti þarf að athuga:

1. Hvert er óskgildi hitans? Stemmir það við hitastigið skv. kerfiráð?
2. Hvert er hitastigið skv. kerfiráð? Stemmir það við raunverulegt gildi á hitanema?
3. Hvert er stýrimerki á stjórnloka skv. kerfiráð? Stemmir það við raunverulega stöðu mótorloka?
4. Rennur heitt vatn um mótorlokann? Eru handlokar opnir?

Með þessari nálgun er oft hægt að komast að rótum vandans og spara tíma og fyrirhöfn.

Straumleysi

Ef straumur fer af kerfinu hættir það að vinna en þegar rafmagn kemur á að nýju fer kerfið sjálft af stað aftur. Þó er ráðlegt að yfirfara öll kerfi eftir straumleysi til að ganga úr skugga um að þau hegði sér rétt og að mæligildi séu rétt.

Tölva frýs

Ef kerfiráður frýs skal hann endurræstur. Ef ekki er hægt að endurræsa með hefðbundnum aðferðum skal halda ræsitakka tölvunnar inni í 5 sekúndur þar til tölvan slekkur á sér. Þá er hægt að ræsa hana aftur.

Iðntölva leysir ekki verkefni sín

Táknræn mynd af iðntölvu með inngöngum og útgöngum

Iðntölvan hefur eigin varnarkerfi og ákveðin frávik geta valdið því að hún hættir að keyra forritið sitt. Þetta getur til dæmis gerst við spennuflökt, rangar tengingar jaðarbúnaðar eða sterka rafsegulpúlsa. Þegar iðntölvan hættir að keyra forritið sitt fer hún úr RUN-ham í STOP. Þetta sést á gaumljósum framan á iðntölvunni (sjá mynd til hliðar):

• PWR: Spennufæðing til iðntölvunnar er í lagi
• RUN: Iðntölvan er að keyra forritið sitt og er í lagi
• ERR: Villa hefur komið upp í iðntölvunni eða einingum hennar

Ef græna ljósið á PWR logar en ekkert RUN-ljós þá er hægt að nota RUN/TERM/STOP rofann til að þvinga iðntölvuna í gang. Þetta er gert með því að færa rofann í RUN-stöðu og aftur í TERM. TERM þýðir að iðntölvan fylgir skipunum frá forritunarhugbúnaði og þetta er yfirleitt rétta staðan fyrir rofann.

Myndin hér til hliðar er BRX-iðntölva frá Iðnaðartækni, aðrar vélar frá Iðnaðartækni hafa sambærilegt viðmót.

Aðrar bilanir

Viðbrögð við viðvörunum sem koma upp í kerfinu eru sýnd í viðvaranaglugga skjámyndakerfisins. Ef ástæða bilunar er óljós skal haft samband við verktaka tölvustýringar.