Flæðilokur

Flæðilokur (VAV - Variable Air Volume) eru lokur með stiglausri opnun og loftmagnsmælingu sem settar eru í loftræsistokka þar sem óskað er eftir stýringu á loftmagni. Hægt er að nota loftmagn til að regla loftgæði (eftir CO2 nema) eða hitastig (eftir hitanema) en einnig getur þurft að nota flæðilokur til að halda réttum mismunaþrýstingi í rýmum með sérútsogi, t.d. í eldhúsum.
Stýring Flæðilokur eru forritaðar til að regla á milli lágmarksloftmagns (Vmin) og hámarksloftmagns (Vmax). Þessi stilligildi eru sett inn örtölvu í mótornum og hann sér sjálfur um reglun á loftmagninu. Stýring frá ytra kerfi fer fram með því að gefa merki á bilinu 0-100% og keyrir flæðilokan þá á milli Vmin og Vmax. Stýrimerkið er hægt að gefa á ýmsan hátt, t.d. með hliðrænu (0-10V) merki frá iðntölvu eða með Modbus skipunum (0-100%) frá iðntölvu. Með hliðrænni stýringu fást mjög takmarkaðar upplýsingar tilbaka frá lokunni en ef notast er við Modbus stýringu er hægt að skiptast á meiri upplýsingum við lokuna. Á Modbus er t.d. hægt að lesa út loftmagn og opnun loku og með því er einfaldara að greina frávik í rekstri. Á myndinni hér til hægri sést yfirlit yfir fleiri flæðilokur þar sem helstu rekstrarstærðir og bilanir eru vaktaðar.
Tilheyrandi loftræsisamstæða Þar sem kerfi er með flæðilokum þarf að stilla tilheyrandi loftræsisamstæðu á þrýstistýringu og óskgildi þrýstings á samstæðunni er stillt þannig að allar flæðilokur geti náð hámarksloftmagni sínu samtímis. Þegar flæðilokur kalla á meira loft opna þær spjaldið og við það fellur þrýstingur í stokkakerfinu og loftræsisamstæðan eykur þá snúningshraða sinn til að halda þrýstingi réttum. Samstæðan dregur svo úr snúningshraða þegar flæðilokurnar þurfa minna loft því lokurnar loka, þrýstingur í stokkum eykst og samstæðan reglar sig niður til að halda réttum þrýstingi. Sjá nánar um virkni loftræsisamstæðna.